Көн темасы
Чирмешәндә торак ремонтлауга 10 миллион сум акча бүлеп бирелгән
Бүген район үзәгендәге күпфатирлы дүрт йортта ремонт эшләре бара. Капиталь ремонт программасына Чирмешәндәге барысы җиде йорт кертелгән. Бу эшләргә 10 миллион сумга якын акча тотылачак. Иң зур эш күләме Татарстан урамындагы 5нче йортта планлаштырылган. Биредә 4 миллион 100 мең сумлык эш башкару күздә тотыла. Бу йортның түбәсен яңартканнар да инде...
Бүген район үзәгендәге күпфатирлы дүрт йортта ремонт эшләре бара. Капиталь ремонт программасына Чирмешәндәге барысы җиде йорт кертелгән. Бу эшләргә 10 миллион сумга якын акча тотылачак.
Иң зур эш күләме Татарстан урамындагы 5нче йортта планлаштырылган. Биредә 4 миллион 100 мең сумлык эш башкару күздә тотыла. Бу йортның түбәсен яңартканнар да инде - шиферны профнастилга алмаштырганнар. Йортка килүче суүткәргечне һәм канализация торбаларын да яңартачаклар. Моннан тыш стеналарны җылытып, сайдинг белән тышлау, подъездларга тимер ишекләр һәм яңа тәрәзәләр кую каралган.
Совет урамындагы 5нче һәм Төньяк урамындагы 2нче йортларның подъездларында һәм подвалларында электрүткәргечләрне алмаштырганнар, монда төзекләндерү эшләре дә башкарылачак. Ә менә Совет урамындагы 45"а" йортта бу төр ремонт эшләре төгәлләнеп тә килә. Биредә дә яңа электр чыбыклары сузганнар, подъездлар яңа төс алган дип була, подвалларда да үзгәрешләр бар.
15 августка кадәр төзүчеләр Совет урамындагы 15нче һәм 48нче, Техническая урамындагы 28нче йортларда да канализация һәм су челтәрләрен алыштырырга, 28нче йортта - подъездда һәм подвалда ремонт үткәрергә тиешләр.
-Ремонт график нигезендә бара. Төзүчеләр тырышып, эшләрен җиренә җиткереп башкаралар, -ди "Чирмешән" торак милекчеләре ширкәте идарәсе рәисе Мәсхүт Хөсәенов. - Әлегә кадәр ремонт баручы йортларда яшәүчеләрдән дәгъва белдерүчеләр булмады. Форсаттан файдаланып шуны да әйтеп узасым килә, әгәр дә ниндидер тәкъдимнәр, шикаятьләр бар икән, чирмешәнлеләр безгә аларны ремонт барышында ук җиткерсеннәр иде. Ремонт өчен йортта яшәүчеләрдән өстәмә акча да җыелмаячак. Алар аның өчен инде ай саен түләп баралар. Әйтик, 10 миллион сумның 5 миллион 500 мең сумы - халыктан җыелган акча, 616 мең сум район бюджетыннан бирелә, республика өлеше - 3 миллион 900 мең сум.
Киләсе елларда район үзәгендәге тагын берничә йорт капиталь ремонт программасына кертеләчәк.
Автор фотолары.
Следите за самым важным и интересным в Telegram-каналеТатмедиа
Нет комментариев