Яшәүче авылында гомер итүче Фәридә һәм Фаил Мортазиннар һәр елны үз бакчаларында үскән карбызлар белән сыйланалар.
-Безнең һава шартларында да өлгерә бу татлы җимеш. Олыгаеп барсак та, тәҗрибәләр ясарга яратабыз, - дип елмая 77 яшьлек Фаил абый. – Тик торырга ярамый, хәрәкәтләнергә кирәк. Бәрәңге, суган, кишер, аш чөгендере, кабак, ташкабак, кыяр, помидор - барысын да үстерәбез.
Мортазиннар әле кош-корт, маллар да асрыйлар. 30 бройлерны үстереп эшкәрткәннәр, сарыклар да тоталар, итлеккә бозау да алалар.
Фәридә апа белән Фаил абый Яшәүчегә кайтып төпләнгәнгә 17 ел. Инде алар авылның үз кешеләренә әйләнгән.
-Әлмәттә яшәгәндә, әле эшләп йөргән вакытта ук, пенсиягә чыккач, җәй айларында биредә яшәү, төп нигезне бетермәү нияте белән яңа йорт өлгерттем, - ди Фаил Мортазин. – Кайтып яши башлагач, китәсебез килмәде, шулай авылда яшәп калдык.
Пенсиядә булса да, көч-дәрте ташып торган якташыбыз биредә дә үзенә шөгыль таба. Кайту белән авыл мәчетендә мөәзин вазифаларын башкаруга керешә, инде 9 ел имамлык итә. Ул мәчетне төзекләндерүгә күп көч куя, авыл өчен янып-көеп йөри, зиратта һәм аның тирәсендә тәртип булдыра.
-Мәчетебез буш тормый: җомгага – унлап, өйлә намазына 5-6 кеше җыела, гаетләрдә мәчетебез тулы була, - ди имам.
Марат Гомәров фотолары
Комментарии
Без имени
0
0
Тьфу-тьфу-тьфу куз тимэсен! Исэнлек исэнлек исэнлек телибез без этиебез белэн эниебезгэ!!!!!!!!