Иске Кадида каз үстерүче осталар күп

Сафиннар аларны  йортларыннан ерак җибәрми, махсус урында асрыйлар. Быел сатып алган 116 бәпкәнең барысы да каз булган, хуҗабикә аларны йолкып, түшкәләрнең күп өлешен саткан да.

-Быел каз өмәләре озаккарак сузылды, беренчеләрен октябрь ахырында суйдык, декабрьгә эшкәртеп бетердек, - диде Зөлфирә. – Көн саен диярлек 3-5 түшкәне әзерләдек. Төп булышчым 6 сыйныфта укучы кызыбыз Илсинә. Әлегә кадәр казларны өйдә йолкысам, быел мунчага янкорма итеп, казлар эшкәртү өчен махсус бүлмә ясадык. Бик җайлы, эш күпкә җиңеләйде.

Каз үстерүчеләрнең аларны урнаштыруда проблемалары юк, үз клиентлары бар. Алдан заказ биреп, 8-10 түшкә алып китүчеләр дә байтак. Эч-башларын иң беренче алып бетерәләр. Каз мамыгыннан ясалган мендәрләр дә заказ буенча китеп бетә.

Сафиннар май аенда бер айлык, линда токымлы, каз бәпкәләре сатып алганнар. Кошларны 5-6 ай симертәләр. Аларга азык әзерләү өчен махсус мич ясаганнар, бөртек, бәрәңге, чөгендер, кабакны бергә кушып, 100 литрлы савытта пешерәләр. Бер көнгә шул кадәр азык китә.

фото: архив