Чирмешәнлеләр бройлерлар өчен дә субсидия алачак

Сайлап алу туры 20 июньдә башланды. 4 июльгә кадәр документлар тапшырган сыер, кәҗә хуҗалары беренче турда ук ярдәм алачак. Быел субсидия бирүгә үзгәрешләр кертелде. Аларның күләме артты, документлар тапшыруда да яңалыклар бар.

- Савым сыеры, кәҗә, ат асрарга субсидия алу өчен азык һәм азык өстәмәләре сатып алуга тотылган чыгымнарны раслый торган документлар: сату-алу шартнамәләре, кабул итү-тапшыру актлары, контроль-касса чеклары яисә касса ордерлары, шулай ук хезмәт хакы исәбенә азык бирү турында түләү ведомостьлары да кирәк, - диде район авыл хуҗалыгы һәм азык-төлек идарәсенең финанс-икътисад бүлеге начальнигы Айсылу Гайнуллина. – Документлар җыелмасына җир участогын арендалау һәм түләүле ветеринар хезмәтләр алу турында документлар да керә.

Әгәр барлык кәгазьләрең дә тәртиптә булса:

• хуҗалыгыңда савым сыерлары 24 баштан артмаса, һәр сөтлебикә өчен 6500 сум күләмендә субсидия бирелә;
• бер яшьтән өлкәнрәк кәҗә хуҗаларына да һәр баш малга 1000 сум түләү каралган;
• ат асраучы шәхси хуҗалыкларга да дәүләттән ярдәм булачак;
• өч яшьтән өлкән бияләргә 5000әр сум субсидия түләнә;
• 50 баштан 100 башка кадәр 30 тәүлектән зур булмаган бәпкә, чеби сатып алучыларга да субсидия түләнәчәк;
• күркә һәм каз бәпкәләренә бер башка – 200 сум;
• үрдәккә – 120 сум;
• бройлерларга 100 сум ярдәм бирелә.
• Мини-ферма төзеп хуҗалыгын зурайтырга теләүчеләргә дә, тана сатып алучыларга да дәүләттән ярдәм булачак.

Быелдан мини-ферма төзүчеләргә дә кәгазьләр тапшыруда үзгәрешләр бар. Төзелеш материаллары сатып алган һәм эш өчен түләү документлар (касса чеклары, актлар) белән расланырга тиеш.

"Безнең Чирмешән"нең Яндекс Дзен , Телеграм каналында һәм МАХ мессенджеренда иң мөһим, кызыклы вакыйгаларны күзәтегез.