Чирмешән районында авариядә яшь егет һәлак булды

Якташыбыз Казан шәһәрендә яшәгән, эшләгән. Дүшәмбе көнне кичке мәлне ул йөртүче “Лада Гранта” автомобиле Яңа Элмәләдән чыгып барганда юл билгесенә килеп бәрелә һәм юл кырыен төшеп китеп, ян ягына ава.

-Руль артындагы 21 яшьлек егет куркынычсыз тизлекне сайламаган, өстәвенә асфальт юеш була, ул автомобиль белән идарә итүне югалта. Авария нәтиҗәсендә алган тән җәрәхәтләреннән егет шунда ук һәлак була, - ди ЮХИДИ район бүлекчәсенең пропаганда буенча инспекторы Аяз Гатиятов. - Якташыбыз куркынычсызлык каешын да такмаган булган.