Иске Котыш укучыларын туңдырылган җиләк-җимештән тәмле компот белән сыйлыйлар

Ольга Хайсанова инде 11 ел Иске Котыш мәктәбе укучыларын тәмле ашлар белән сыйлый. Без барган көнне дә пешекче апалары аларга "дуслык" боткасы пешергән иде.

-Ольга Васильевнаның ашларын бик яратып ашыйбыз, боткалары да, итле һәм балыклы ашлары да бик тәмле, - ди 8 класс укучысы Полина Шохина.

Мәктәп яны тәҗрибә участогында үстерелгән яшелчә, җиләк-җимеш менюны баетырга ярдәм итә. Бәрәңге, кәбестә, кишер, аш чөгендере, суган - барысы да үзләре үстергән. Артыгын сатып табыш та алалар. Алма, чия, карлыганны туңдырып витаминнарга бай компот әзерлиләр. Бәрәңгене 50 сутыйлы участокта үстерәләр.

-Өч ел элек үзебезнең көч белән ясалган теплицада помидор өлгертәбез, - ди укыту эшләре буенча директор урынбасары Петр Учайкин. - Бу яшелчәне консервлап та куялар. Үзебездән артканын көзге ярминкәдә саттык.

Пешекчеләр 34 мәктәп укучысына һәм балалар бакчасында тәрбияләнүче 12 сабыйга да аш әзерлиләр. Тәмле ашлар.