Светлана Портнова юбилеен үткәрә

Светлана Портнова инде 26 ел район почта участогында хезмәт куйган. Бүген 55 яшен тутырган якташыбыз яшьрәк вакытында тукучы да була.

Баштарак телеграммалар таратса, соңгы 15 елда ул хат ташучы булып эшли, Чирмешәннең яңа микрорайоны халкына матбугат басмалары китерә. Бу якларда аны күпләр таный, белә. Әле менә соңгы көннәрдә үзен еш юксыналар, чөнки почта таратуда өзеклекләр ешайды. Светлана Алексеевна ялда - отпускта икән, аннары пенсиягә чыгачак. Абүнәчеләр аның урынына киләчәк хезмәткәрнең дә җаваплы, өлгер буласына өметләнә.

Светлана Портнова - үрнәк әни, беръялгызы өч бала үстергән, аларга яхшы тәрбия биргән. Өч баласы да Чирмешәндә яши.

- Әниебез - таянычыбыз, безгә назын кызганмады, ярдәменнән ташламый, үзен дә бик яратабыз, - ди кызы Анастасия.

Бу атнада Портновлар юбилей мәҗлесенә җыела. Кунаклар күп булачак - Светлана Алексеевналар - 10 бертуган! Барысы да исән-сау!

Фото архивтан