Түбән Кәминкәдән Низамовларның казлары көзгә төрле шәһәрләргә “оча”

Ралия һәм Габбас Низамовлар йортында гына да 120 каз бәпкәсе үсеп килә. Бер-ике атнадан алар су буена китәчәк, әлегә бәләкәй кошлар таздагы суда гына коена.

-Былтыр 50 баш каз үстергән идек, быел күбрәк алдык бу кошларны, - ди чирәмдә бәпкәләр саклаучы Ралия апа. – Ике атналык “сары йомгакларны” Лаештан барып алдык.

Ралия апа бәпкә саклауны төштән соң оныкларына тапшыра. Мәктәптән соң бәпкәләр янында - Айгөл, Азат, Азамат. Кечкенә кошларга әлегә махсус катнашазык ашаталар, бераз үскәч - бәрәңге пешереп - бутап бирәләр.

-Бәрәңге дә, фураж да җитәрлек, берәр айлык булгач, бутаганны бик яратып ашыйлар. Азык әзерләү өчен махсус мичебез бар, - ди хуҗабикә. – Су буена куа башлагач, эш күпкә җиңеләя.

Низамовлар йортында әле тагын 22 баш үрдәк тә бар.

-Алары тиз өлгерә, 70 көннән үрдәкне суярга була. Гадәттә, бу кошларны сентябрьдән калдырмыйбыз. Түшкәләрне куярга зур тыңдыргычларыбыз бар, - ди якташыбыз. – Ә менә казларны декабрьләргә кадәр симертәбез.

Менә шул вакытта Низамовларда каз өмәләре ешая да инде. Бу көннәрдә аларда бер бәйрәм төсле була, дуслар, туганнар бергә җыелышып каз йолкыйлар.

-Түшкәләрне балаларга, туганнарга бирәбез, үзебездән артканын сатабыз да, - ди Ралия апа.

автор фотолары