Салаватның әнисе Тәкълимә Фәтхетдинова: «Салават әни белән без бертуганнар, ди»

Салават Фәтхетдиновның әнисе - Тәкълимә апа шушы көннәрдә туган көнен билгели, аңа 86 яшь тула. Эстраданың мэтрын үстергән ананы без дә шалтыратып котладык.

- Рәхмәт шалтыратуыгызга. Исемемне, балам, дөрес яз. Тәкълимә дип куй. Фәтхетдинова, Зәки кызы булам. Əтием дә, ирем дә - Зәки иде. Салават, отчестволар бертөрле булгач: "Əни белән без бертуганнар", - дип шаярта.
86 яше тула дип яз. Бер авырткан җирем дә юк, кан басымы дигәннәре генә интектерә. Салават кыйммәтле дарулар җибәреп тора, шуларны һәрдаими эчәм.

- Авылда ниләр эшләп ятасыз?
- Көн дә яңгыр ява, әллә нәрсә эшләп булмый. Утырткан бәрәңге дә чыга алмый әле, череп ята, күрәсең. Ə чүп үләне шундук калкып чыкты.

- Бәрәңгегезне үзегез утырттыгызмы? Салават кайтып утыртыштымы?
- Кирәк, ди, Салаватка синең бакчаң! Бер көнгә, бер төнгә кайтып киткән арада булган серләрне дә бер-беребезгә сөйләшеп өлгермибез. Рәфил улым хатыны белән утырта. Ул җитешмәгән арада кеше яллыйм. Авылыбызда мәрхәмәтле кешеләр, ярдәм итәм дип торучылар да күп.

- Салават еш кайтамы соң?
- Узган айны кайткан иде. Июньнең 20ләрендә кайтам диде. "Инәй, тамак ачты, ашарга пешердеңме?" - дип кайтып керә ул. Мин әзерләнеп көтеп торам. Бәрәңге ярата ул, аны пешерәм. Шулпа салам. Безнең якта шәңге пешерәләр, аны пешерми калмыйм. Кайта ул, иренми. Үзенең шоферы бар. Ләйсән дә кайта. Кайчак балаларны да ияртәләр. Салават матди ярдәм күрсәтеп кенә тора. Акчадан, матур киемнән, ризыктан өзми, һәрчак мул итеп җибәреп тора.

- Ләйсәнгә яхшы каенана була алдым дип саныйсызмы?
- Бергә яшәмәдек бит, кайтып киткәндә без бер-беребезгә әйбәт. Киленем яхшы, быел бергә яшәүләренә 30 ел була. Əле дә хәтерлим, 1987 елның 5 августында алып кайткан идек. Үзең әйбәт булсаң, килен кеше дә яхшы була. Ничә киленем бар, берсе турында да начар сүз әйткәнем булмады. Сабырлыгым да көчледер. Рәфил улым һәм аның хатыны белән 12 ел бергә яшәдем, ул киленем белән дә талашканым булмады. Аллага шөкер.

- Бәхетле картлыкта яшим дип әйтә аласыз инде?
- Əйе. Интегеп яшәүләрем - артта, яшьлектә калды. Көн буе көтү көттем, төн буе алты балама ашарга эзләп чыга идем. Салават: "Инәй, ничек син безне берүзең аякка бастырдың?" - дип шакката хәзер.

- Казанга еш барасызмы?
- Елга бер барып кайтам. "Машина җибәрәм, киләсеңме?" - ди Салават. Өйне ташлап, ничек чыгып китәсең инде?! Өемне бик яратам. Əйттем бит, моңа кадәр төпчек улым белән яшәдек, аннары Салават йорт алып, башка чыгарды. 17 ел хәзер берүзем яшим. Йортым кадәрле мунчам бар. Дөньям шәп, шөкер итеп яшисе генә!

+