Чирмешәндә суүткәргечләрне яңарталар

Бу көннәрдә район үзәгендәге кайбер урамнардагы үткәргечләрдә су бетеп торырга мөмкин. Бу - яңа су торбалары тарту белән бәйле.

Совет, Гагарин, Нагорная, Карл Маркс, Шешминская урамнарында, барлыгы 2 километр да 300 метр озынлыкта су челтәрләре яңартыла. Әлеге эшләрне республиканың "Чиста су" программасы нигезендә башкаралар.

-Торбаларны тоташтырганда су белән өзеклекләр булырга мөмкин, шуңа күрә бу чорда халыкка бераз түзәргә туры киләчәк, - ди "Чирмешән районы коммуналь челтәрләре" җәмгыяте директоры урынбасары Михаил Арютин.