“Буржуйка“ ышанычлы түгел

Янгын күзәтчелеге хезмәткәрләре салкыннар вакытында уттан саклануның таләпләрен һәм кагыйдәләрен кабат искә төшерә.

Газ плитәләрегез, электр җиһазларыгыз кабызган килеш калмаганмы? Өйдән чыкканда моны кат-кат тикшерүең хәерле. Аларны карап, күзәтеп торуны да балаларга гына ышандырмагыз, диләр белгечләр.

-Электр үткәргечләрне кыздырмагыз, алар төзек булырга тиеш. Кыска ялганыш очрагында җиһазларны кичекмәстән электр челтәреннән ычкындырырга кирәк, - ди район янгын күзәтчелеге хезмәтенең өлкән инспекторы Андрей Фомин. - Кулдан ясалган яки ачык утлы җылыткычларны, "буржуйка" ише мичләрне өйдә файдаланмаска киңәш итәбез.

Җылыткыч электр җиһазларын эшләткәндә, аларны кирпеч, керамика ише янмый торган материаллар өстенә куюың яхшы. Урын-җир өстендә, бигрәк тә исерек килеш тәмәке тарту аркасында да ут чыгарга мөмкин.

Янгын очрагында 01, 2-57-07, ә кесә телефоныннан 112 номерларын җыеп хәбәр итәргә.