Берәүнең югалган акчаларын Чирмешән универмагы мөдире табып биргән

55 ел элек

Яңа уку елында Түбән Кәминкә сигезьеллык мәктәбенә 299 бала укый.

“Ленин юлында” – 4 сентябрь, 1968 ел.

Киров исемендәге колхозның тәҗрибәле шоферы Кадыйр Гайнуллин, 20 еллап бу эшендә эшләп, мондый бөртеклеләр уңышын күрмәгән. Көн-төн эшләгән, ул комбайн астыннан ындыр табагына тәүлегенә 15-18 рейс ясады.

“Ленин юлында” – 11 сентябрь, 1968 ел.

“Новый путь” колхозының басуда эшләүче механизаторлар үзләрен тәмле ашлар белән сыйлаучы Мария Фроловага һәм Ксения Лукьяновага бик рәхмәтле.

“Ленин юлында” – 14 сентябрь, 1968 ел.

Ватан амбарларына 57 мең тонна Чирмешән икмәге салынган. Бу узган елгыдан 26 мең тоннага күбрәк.

“Ленин юлында” – 18 сентябрь, 1968 ел.

Район үзәгендә акчаларымны югалткан идем. Район газетасыннан “Табылдыклар өстәле”ндәге игъланнан аларның табылуын укыдым. Чирмешән универмагы мөдире Татьяна Козловага бик зур рәхмәт.

(Редакциягә килгән хаттан).

“Ленин юлында” – 20 сентябрь, 1968 ел.

Иске Кадида таштан төзелгән типовой яңа кибет бинасы файдалануга тапшырылды.

“Ленин юлында” – 20 сентябрь, 1968 ел.