Чирмешән тарихчысы Николай Фролов вафат булды

Ул районыбыз тарихын чын-чынлап, җитди өйрәнә башлаган беренче кеше. Үткәндәге бик күп мәгълүматларны эзләп, табып, халыкка җиткерде, әллә ничә китап чыгарды, алар бүген дә бәһасез хәзинә.

Республика күләмендә билгеле мемориаль үзәк тә аның тырышлыгы белән ачылды, анда бик күп тарихи экспонатлар урын  алды, бик күп райондашларыбызның моңа кадәр билгесез язмышы ачыкланды. Тынгысыз, зур гыйлемле, киң эрудицияле белгеч, уникаль кеше иде Николай Сергеевич Фролов. Соңгы елларда кызы һәм кияве торган Америка Кушма Штатларында, Нью-Йоркта яшәде, Чирмешән белән араны өзмәде.

Ерак чит илдә, 81 яшендә гомере өзелгән якташыбызның авыр туфрагы җиңел булсын. Тарихчы Николай Сергеевич Фроловны онытмабыз, аның турында якты истәлек безнең күңелләрдә мәңге сакланыр.