Чирмешәндә узган чаңгы эстафетасы ярышында төп призлар ике җиңүчегә бирелде

Мәктәп укучылары арасында “Сабантуй” стадионында үткән ярышка Ульяновкадан дүрт этапта дүрт команда стартка басты.

- Без үзебездә дә чаңгы ярышларын еш уздырабыз, остарабыз, - ди әлеге мәктәп дирекиоры Андриян Тимирясов.

Урта мәктәпләрдән - ярышны төп оештыручы - Чирмешән кадетлар мәктәп-интернаты, ә төп мәктәпләр арасында Кармыш мәктәбе беренче урынны яуладылар.

- Мондый бәйге ел саен һәм гел кызык үтә, - ди Лашман командасы җитәкчесе, физкультура укытучысы Фаиз Билалов. -Кичә үзебезнең мәктәптә йөзү буенча ярыш булды, бүген бирегә дә килми калырга уйламадык. Яшь аермасына карап, чаңгычылар 1, 2, 3, 4 километр арада узыштылар.

- Чаңгыларны монда ук бирделәр, үзебездә дә чаңгы юлына еш чыгабыз, - ди Бәркәтә мәктәбенең 4 сыйныф укучысы Халисә Рахманова.

Мәктәп укучылары спартакиадасы кысаларында үткән бүгенге бәйгедә урта мәктәпләр арасында Ульяновка командасы – икенче, ивашкинолылар өченче урында. Төп мәктәпләр группасында Шешминка командасы – икенче, Түбән Кәминкә чаңгычылары – өченче. Алдарак язылганча, төп бүләкләрне кадетлар мәктәп-интернаты һәм Кармыш мәктәбе чаңгычылары алып китте.

Җиңүчеләргә мәгариф бүлегенең кубоклары, медальләре һәм Почет грамоталары тапшырдылар.

фото: Кадыйр Гомәров