Чирмешән районы юлчылары сезонны башлады
“Татавтодор” җәмгыятенең район участогы ремонт сезонын мартның соңгы атналарында ук башлап җибәрде, юллардагы чокыр-чакырларга асфальт түшәү эшенә керештеләр.
-Эшне яңа христиан зираты яныннан Шентала ягындагы бензин салу станциясен тоташтыручы – Чирмешәнне әйләнеп узучы юлдан башлап җибәрдек, - ди юл участогы начальнигы урынбасары Исхак Әбүнәгыймов. – Тик, һава торышы бозылып тору сәбәпле, эшне берничә көнгә туктатып торырга туры килде.
Юлчылар әлеге участокта ремонтны тәмамлагач, Лениногорск - Чирмешән, Акъяр – Чирмешән – Шентала, Кузай – Нурлат трассаларын, аннан соң авылларга алып керүче юлларны, ягъни җәмгыять карамагындагы 300 километрга якын юл өслеген тәртипкә китерәчәкләр.
-Чокырларны ямау вакытына үзебезнең асфальт заводын кабыздык, - ди Исхак Гариф улы. – Асфальт ясау өчен җитәрлек күләмдә материал кайтарылды, техникалар төзек, эшчеләр белән комплектланган.
фото: архив
Следите за самым важным и интересным в Telegram-каналеТатмедиа
Нет комментариев