Утыз Имән авылы пенсионеры шахмат уенын популярлаштырырга ниятли

Шахмат кешенең хәтерен, уйлау-фикерләү дәрәҗәсен шактый арттыра, тәвәккәл булырга өйрәтә.

“Безнең Чирмешән” газетасы редакциясе күп еллар дәвамында шахмат турнирлары оештырды. Бу ярышларда бигрәк тә мәктәп укучылары актив катнашты. Алар, олыларга караганда да, шахмат уенын бирелеп, тәмен табып уйныйлар.

Иганәчебез – якташыбыз Фәгыйль Гатиятов та истәлекле бүләкләр, кубок, медальләр алып биреп, шахмат сөючеләргә төрлечә ярдәм итеп тора. Аңа район шахматчылары исеменнән зур рәхмәт.

Районыбызның үзәк мәчетендә дә берничә тапкыр шахмат ярышлары үткәрелде. Бу башлангыч динебезне тагын да җанландырып җибәрүче гамәл. Мәчет бусагасын атлап керүче үзен башкачарак хис итә. Анда ул рухи һәм әхлакый тәрбия дә ала.

Һиндстанда V гасыр азагында барлыкка килеп, “чатуранга” дип аталган уенны бераздан Европа илләрендә “шахмат” дип йөртә башлыйлар. Рәшит Нәҗметдиновның “Шахмат уены” китабы әлеге уен белән яңа гына кызыксына башлаучылар өчен иң кирәкле басмалардан санала.

Самат Ризванов.

Утыз Имән авылы.