Чирмешәндә җәяүлеләр юлында 17 яшьлек укучы кызны бәрдергәннәр

Юл - транспорт һәлакәте кичке сәгать алтыда Чирмешән лицее янындарак, юл чатында була. 32 яшьлек ир-егет идарә итүче "Фиат Албеа" автомобиле җәяүлеләр юлында 11 класс укучысын бәрдергән. Бәхеткә, кыз бала исән, ләкин тән җәрәхәтләре алган, аны район үзәк больницасына озатканнар.

-Машина йөртүче, үзе әйтүенчә, кызны күрмәгән, - ди ЮХИДИ бүлекчәсенең пропаганда буенча инспекторы Рәмис Шәкүров. - Дөрестән дә, бу тирәдә караңгы, яктырткычлар янмый, әмма әлеге факт машина йөртүчене җаваплылыктан азат итми. Мәгариф учреждениесе янында яктырткчылар булмаганы өчен , җаваплы кешеләргә карата да чара күрәчәкбез. Гомумән, юлларда игътибарлы, машина йөртүчеләр, җәяүлеләр дә бер-беребезгә карата ихтирамлы булыйк, юлда йөрү кагыйдәләрен бозмыйк.

Автор фотосы