Чирмешән боксчылары кунакларга "ачык йөз күрсәтмәде"

Бокс буенча Чирмешәндә узган турнирның финалында безнең кайбер егетләр тамашачыларны гына түгел, хөкемдарларны да шаккаттырды. Якташларыбыз бәйгенең иң хәлиткеч өлешендә үзләренең көчле-көчле көндәшләрен бер-бер артлы ук диярлек "нокдаун"га җибәрде.

Михаил Яманов, Роман Степченко, Анатолий Тарабрин әнә шулай осталык күрсәтеп, безнең район командасының беренче урынга чыгуына үзләреннән аеруча зур өлеш керттеләр. Көндәшләр дә андый-мондый гына түгел бит - республиканың шәһәр-районнарыннан тыш, бәйгегә Ульяновскидан, Самарадан, Төмәннән үк яшь спортчылар килгән. Барлыгы 11 команда, 85 катнашучы. Шулар арасыннан 30 алтын медальнең 12се, 30 көмешнең 9ы - безнең спортчылар "трофее".

Турнирда районыбыз өчен "Чирмешән" балалар һәм яшүсмерләр спорт мәктәбенә караган, Николай Емельянов җитәкчелегендә шөгыльләнүче утызлап малай һәм кыз, яшүсмер тирләп-пеште. Ивашкинолылар Станислав Кудряшов, Артем Емельянов, Александр Апалаев, Роман Степченко, Михаил Яманов, Күтәмәдән Константин Меркурьев, кадетлар мәктәп-интернатыннан Анатолий Тарабрин үз үлчәү категорияләрендә җиңүчеләр.

Алда хәбәр иткәнебезчә, бу көнне рингта кызлар да чыкты. Безнекеләрдән Ариадна Емельянова, Дарья Дякону, Ольга Андреева, Инна Андреева, Анастасия Иванова - үз тиңнәре арасында беренчеләр.

-Даша, сиңа, кыз балага, нәрсәгә инде бу бокс? - дим пьедесталдан әле генә бүләкләнеп төшкән Ивашкино кызы Дарья Дяконуга.

-Абый, беләсезме, бокс белән шөгыльләнгәнче тамагым еш авырта иде, менә ике ел секциягә йөрим, тьфү-тьфү, зарланмыйм, исәнлегем ныгыганын сизәм. Көчем артты, киләчәктә бокс үземне яклар өчен кирәк булуы да бар. Җиңүемне әти-әниемә багышлыйм, - дип җавап бирде Дарья.

Турнирда үз үлчәү категорияләрендә ивашкинолылар: Анжелика Антонова, Иван Толстов, Максим Апалаев, Иван Гаврилов, Василий Ляляков, Күтәмә мәктәбеннән Любовь Уляшкина, Влад Зорин, 1 нче Чирмешән мәктәбеннән Александр Кобылин икенче урын яуладылар.

-Күренеп тора, боксчыларыгыз сугышырга һәвәсләр, районыгыз өчен яхшы чыгыш ясарга тырышалар. Бераз техника өстендә генә эшләргә кирәк. Мин үзем Чирмешәндә беренче тапкыр, матур яшисез, төзелешләрегез, йортларыгыз ошады, - ди Ульяновск шәһәреннән килгән команданың тренеры, судья Михаил Тимохин. Михаил Николаевич тумышы белән Чүпрәле районыннан икән.

Турнирда Чирмешән командасы җиңүче булса, Төмәннән килгән кунакларыбыз - икенче, Яр Чаллы боксчылары өченче урынга чыкты.

Шулай итеп, Чирмешән ике көн бокс белән "у" килеп алды. Әлеге саллы турнирны ачу тантанасына Татарстан Бокс федерациясенең көньяк-көнчыгыш бүлеге президенты, якташыбыз Сергей Игнатьев та кайткан иде.