Күпләр быелгы уңышның черүенә зарлана.
- Бәрәңгене коры вакытта гына казып алырга тырышыгыз. Юеш уңыш күпкә начаррак саклана, чөнки кабыктагы дымлы туфрак черү өчен яхшы шартлар тудыра.
- Сакланырга салыначак бәрәңге яхшы кибәргә тиеш. Моның өчен уңышны 7-10 көнгә лапас астында яисә җилли торган сарайга таратып салыгыз. Шул вакыт эчендә кабыгындагы вак яралар төзәлә, ә артык дым парга әйләнә.
- Базга озатыр алдыннан бәрәңгеләрне берәмләп карап чыгарга кирәк. Зыян күргән, ярылган, чери башлаган яисә яшелләнгән бәрәңгене сакларга кирәкми. Кышкылыкка саклау өчен уртача зурлыктагы, тыгыз һәм сәламәт бәрәңгеләрне генә калдырыгыз.
- Бәрәңге +2...+4 градус температурада һәм һава дымлылыгы 80-90 процент булганда яхшырак саклана. Артык җылы бүлмәдә ул бик тиз шыта, ә салкында бозыла һәм баллана башлый.
- Бәрәңгене полиэтилен капчыкларда яисә ябык контейнерларда сакламагыз — алар дым җыя һәм бәрәңге чери башлый. Иң яхшы вариант – агач тартмалар, кәрзиннәр, "сетка" капчыклар. Төп шарт — һаваның ирекле әйләнеше.
- Уңышны артык өеп салмагыз. Тартмалардагы бәрәңге өеменең калынлыгы 1-1,2 метрдан артмаска тиеш. Югыйсә, аскы бәрәңгеләр тизрәк бозылачак.
- Бәрәңгене суган, сарымсак яисә алма белән янәшә сакламагыз. Суган һәм сарымсак бәрәңгеләрнең черүен тизләтә торган матдәләр бүлеп чыгара, ә алмалар этилен бүлеп чыгара, аның янәшәсендә бәрәңге тиз шыта.
"Безнең Чирмешән"нең Яндекс Дзен , Телеграм каналында һәм МАХ мессенджеренда иң мөһим, кызыклы вакыйгаларны күзәтегез.
Нет комментариев