АП-АК БУЛСЫН ДИСӘҢ...

Елның иң ямьле чорында без! Җәй көне күпләребез аклы кием кияргә ярата. Эсседә андый кием тәнгә рәхәтен бик рәхәт, әмма тиз керләнә.
Бер-ике юсаң, соргылт төскә керә, ямьсезләнә. Төсен җуйган яки җиң төпләре тирдән саргайган кием чынлап та берәүне дә бизәми. Мондый очракта нишләргә?

Кием соры төскә кермәсен өчен:
* 30 процентлы водород перекисе (аны даруханәләрдә саталар) бик яхшы агарту үзлегенә ия.
Табакка җылы су агызып (30 градустан 60 градуска кадәр), бер бөке чамасы водород перекисе салыгыз. Шушы суга керне ким дигәндә бер сәгатькә, күп дигәндә дүрт сәгатькә батырып тотыгыз. Соңыннан чиста су белән чайкап, кояшка кибәргә элегез. Водород перекисе белән биттәге кара төкләрне дә агарталар;

* натрий пербораты. Натрий бикорбанатын күпләр белсә дә (чәй содасы), мондыен ишеткәнегез булдымы икән? Аны да даруханәдән сатып алырга мөмкин. Керне агарту процессы водород перекисе белән эш иткәндәге кебек үк. Натрий пербораты 1 литр суга 3 аш кашыгы нисбәтеннән салына. Соңыннан юган керне яхшылап чайкап, кояшта киптерергә кирәк;

* натрий бикорбанаты (чәй содасы). Керне агарту өчен, ярты стакан соданы машинаның кондиционер сала торган бүлеменә салалар.
Шулай ук ярты лимонның сугын да кушарга була.

Кер саргаймасын өчен:
* ак күлмәкләрне 1 литр суга 1 стакан коры сөт порошогы кушып та юалар. Саргайган яка һәм җиң очларын менә дигән итеп агарта ул;

* кер юдырганда машина барабанына кечкенә генә янчыкка төрелгән йомырка кабыгы салып карагыз әле. Соңыннан керне гел йомырка кабыгы белән генә юа башлаячаксыз.

Киемдәге косметика тапларын бетерү өчен:
* тапларны бит чистарту өчен тәгаенләнгән дымлы салфетка белән ышкырга керешкәнче, иң элек ул урынга салфетканы куеп кына торыгыз, таплы урын чылансын. Менә хәзер ышкып бетерсәгез дә була;

* савыт-саба юа торган сыекчалар да тапларны яхшы бетерә. Профессиональ визажистлар пумалаларын шуның белән юалар. Күп кенә бизәнү әйберләренең составында майлар була, аеруча төсле кремда, менә шуңа да бу сыекча косметика тапларын «ялап» кына ала.

http://www.syuyumbike.ru/hatyn-kyz-galeme/belmesen-bel/?id=5658