Хатынын үтергән Иске Элмәле кешесен җиде елга төрмәгә утырттылар

автор, 20 сентябрь 2016 - 07:11

4646

Хатынын кыйнап үтерүдә гаепләнгән Юрий Наумов Чүпрәле район суды утырышында үзенең гаебен таныды. Шул ук вакытта артык исерек хәлдә булудан, хатыны Еленага кул күтәрүен хәтерләмәвен дә әйтте. Күпчелек җинаятьләрнең нигезендә эчүчелек ята. Пәйгамбәребез үзенең бер хәдисендә: "Аракы - бөтен усаллыкларның анасыдыр", - дигән. Чыннан да, начарлык, явызлык, тавыш-гауга, җәнҗалларның күбесе...

Күпчелек җинаятьләрнең нигезендә эчүчелек ята. Пәйгамбәребез үзенең бер хәдисендә: "Аракы - бөтен усаллыкларның анасыдыр", - дигән. Чыннан да, начарлык, явызлык, тавыш-гауга, җәнҗалларның күбесе эчүчелек нәтиҗәсендә килеп чыга. Каннары кызган исерекләр берсеннән- берсе кечкенә балаларын да, хатыннарын да кызганмый. Ирләренең кыйнауларына, җәберләүләренә түзә алмаганнар хокук саклау органнарына, судларга килеп гариза язарга мәҗбүр була. Үзара килеп чыккан конфликтлардан соң шешәдәшләрнең кулларына пычак алу очраклары да теркәлеп тора. Сыра, аракының баш миен томалавы нәтиҗәсендә әнә шулай аяныч хәлләргә китерә торган җинаятьләр кылына. Гаиләдә ир белән хатынның бергәләшеп хәмер чөмерүе бигрәк тә аяныч. Иске Элмәле авылында яшәүче Елена һәм Юрий Наумовлар гаиләсендә килеп чыккан фаҗигага да эчүчелек гаепле. Агымдагы елның 23 январенда әлеге ир белән хатын Чуваш Ишлесе авылында яшәүче туганнарында кунак булып кайта. Көн кичкә авышкан вакыттарак болар арасында гауга чыга. Ир, әлбәттә, ирлеген итә. Хатыны Еленаның йөзенә берничә мәртәбә йодрык белән суга һәм теге бичара башта башы белән фляга өстенә сугыла һәм идәнгә егылып төшә, баш ярасыннан идән буйлап кан ага. Чыгырыннан очкынган Юрий аннан соң да туктап калмый, аяклары белән типкәли. Гәүдәсе хәрәкәтләнми башлагач тегене утыргычка күтәреп утырта, әмма бу чакта хатынның утырырга мөмкинлеге калмаган була инде. Әле аннан соң да Еленаның битенә ике-өч мәртәбә учы белән суга һәм зал бүлмәсендәге диванга кертеп сала да йокларга ята. Ике сәгать чамасы йоклап алгач хатынын уятмакчы була, әмма бу вакытта инде аның гәүдәсе суына. Шул кичне полиция хезмәткәрләре фаҗига урынына киләләр һәм җинаять кылуда шикле кеше- Юрий Наумовны кулга алалар. Район суды үзенең чираттагы утырышында Юрий Наумовны гаепле дип тапты һәм РФ Җинаятьләр кодексының 111 маддәсендәге 4 нче бүлекчәсе буенча җиде ел да алты айга ирегеннән мәхрүм итте.

Лилия Мөшәрәпова,

Чүпрәле район судының матбугат секретаре

Следите за самым важным и интересным в Telegram-каналеТатмедиа