Чирмешән халык театры яңа премьера әзерли

Чирмешән халык театры артистлары драматург Данил Салиховның "Кызлар капкыны" исемле комедиясен сәхнәләштерәләр.

-Спектакльдә сигез кеше катнаша,- ди театрның режиссеры Рушания Шакирова. - Нигездә, чирмешәнлеләр уйный, шулай ук Иске Үтәмеш һәм Туймәт авыллары үзешчәннәре дә бар.

Район тамашачылары спектакльне февраль азагында күрә алачак.

Сүз уңаеннан, 16 февральдә Чистайда узачак балалар-яшүсмерләр театрлары һәм курчак театрлары коллективларының "Иделкәем" республика смотр-конкурсында безнең район вәкилләре дә катнашачак. Район мәдәният йорты каршындагы татар төркеме "Соңгы Шүрәле", рус төркеме "Принцесса и дракон" исемле әкиятләр күрсәтергә җыеналар.