Әниләргә нинди акча бирәләр?

Соңгы вакытларда пенсиядәге әби-апалар Пенсия фондының район идарәсенә еш килә башлаган. Балалары булган кешеләрнең пенсияләре, кабат исәпләгәч, арта диләр. Бу дөресме?

Әлеге сорауга РФ Пенсия фондының район идарәсе начальнигы Гөлфия Гыймранова түбәндәгечә аңлатма бирә: "Пенсияләрне кабат исәпләтү, турысын әйтәм, барлык пенсионерларга да файдага түгел. Санатуның нәтиҗәсе һәркемнең шәхси исәп-хисап күрсәткеченнән тора. Бер, ике генә баласы булганнар өчен файдасы булу икеле. Пенсияне баллар буенча яңадан исәпләгәч стаж коэффиценты, шул ук вакытта авыл хуҗалыгында һәм тиешле еллар эшләгән стаж (выслуга лет) да кими. Пенсия күләме артуга гарантия юк, берәүгә ул - 5, икенчеләргә 200 сум булырга, хәтта кимергә дә мөмкин. Гариза бирү срогы чикләнмәгән, аның белән бергә паспорт һәм барлык балаларның туу турында таныклыкларын алып килергә кирәк."