Ивашкинодагы фельдшер-акушерлык пунктында җаваплы хезмәткәрләр эшли

Ирина Николаевна Кузнецова инде 34 ел Ивашкино фельдшер-акушерлык пунктында хезмәт куя, авылдашларын дәвалый.

-Укып бетергәннән бирле шунда, эшем ошый, - ди ул. -Ирем Юрий белән укып бетерүгә гаилә кордык, өч бала үстердек, алар барысы да укытучы һөнәрен сайладылар, Алты оныгыбыз бар. Шөкер, быел Ивашкинода ике бала туды да.

-Без әлеге ФАП өчен борчылмыйбыз, Ирина Николаевна үз эшенең чын остасы, - ди район үзәк больницасы баш врачы урынбасары Рәфис Гафуров.

Әнисе дә макталып эшләгән, пөхтә, актив кеше шул - Мария Наумовна Романовская 36 ел буе Ивашкино китапханәсендә хезмәт куя, актив җәмәгать эшчәнлеге алып бара. Инде мәрхүмә булса да, аны әле дә еш искә төшерәләр.

-Әни янында эшкә өйрәндем, - ди Ирина Кузнецова. -Менә бүген дә, мәдәният йортына, китапханәгә килгәч аны уйлап алдым. Биредәге хезмәткәрләр дә үз эшләренә бирелгән, тырыш кешеләр.

Автор фотосы