Чирмешәндә яшәүче Наҗия әби Галимовага Мәскәүдән хат килде

Чирмешәндә яшәүче Наҗия Хаҗи кызы Галимова да 90 яшьлек юбилее уңаеннан Россия Президенты һәм район башлыгы исемнәреннән юлланган котлау хатлары, бүләкләр алды.

Лашман авылында туып-үскән кыз Бөек Ватан сугышы елларында урман кискән, сыер җигеп җир сукалаган, дистәләрчә километр ераклыктан орлык ташыган, кыскасы - тормышның шактый михнәтләрен кичергән шәхес. 1951елда алар Әмир авылы егете Фәйзерахман Галимов, сугыш ветераны белән гаилә корып өч бала үстерәләр. Кызганыч, алты ел элек Наҗия әби тол кала. Хәзер ул ветеран хатыны буларак район үзәгендә бирелгән уңайлы фатирында гомер итә.