Төзелешкә – бал

Шешминкада яшәүчеләрнең күбесе Димитрий Солунский храмын төзекләндерүдә актив катнашалар.

Авыл кешеләре инде берничә тапкыр чиркәү тирәсендәге төзелеш материаллары калдыкларын җыештырдылар. Өмәләрнең берсендә Николай Зубов үз тракторы белән 4 арба чүп-чар чыгарды.

Шешминкалылар гына түгел, читтә яшәүче авылдашлары да чиркәүне төзекләндерүгә һәрдаим өлеш кертәләр.

Районда билгеле умартачы Татьяна Юрина әлеге изге эшкә ярдәм йөзеннән бер фляга бал, пенсионер Нина Журавлева 2 мең сум акча биргәннәр. Мәскәүдә яшәүче авылдашлары Александр Конев - 15 мең сум, Казаннан авыл хуҗалыгы фәннәре кандидаты Николай Митряев 5 мең сум акча җибәргәннәр. Казанда яшәүче велоспортчы Равил Хәбибрахманов та Шешминка аша узганда чиркәү төзекләндерүне күреп, изге эшкә өлеш керткән.

- Хәзер храм төзү өчен проект-смета документлары әзерләнә, - ди чиркәүне төзекләндерүдә башлап йөрүчеләрнең берсе - Екатерина Зубова. - Проект булса, нефть оешмалары җитәкчеләре дә төзелешкә саллы өлеш кертергә вәгъдә бирделәр.