«Гомер көзе җылы булсын»: Чирмешәндә өлкәннәребезне хөрмәтләделәр

Хезмәтләре, зирәклекләре һәм сабырлыклары белән туган ягыбыз тарихын булдырган өлкән буын вәкилләрен октябрь ае башында район мәдәният йортына дәшеп хөрмәтләү матур традициягә әверелде. «Гомер көзе җылы булсын» дип аталган быелгы бәйрәм концерты да гади чара гына түгел, өлкәннәребезгә олы ихтирам билгесе.

Бәйрәм «Рәйхан» хореография коллективының «Халкым» биюе белән башланып китте. Аннан соң район башлыгы Рамил Айбатов кунакларны бәйрәм белән тәбрикләде һәм ике якташыбызга югары бүләкләр тапшырды.

Хезмәт һәм туган җиргә тугрылык өчен бүләкләр

Лагерка авылыннан Юрий Павлов күпьеллык нәтиҗәле хезмәте һәм Татарстан Республикасы агросәнәгать комплексын үстерүгә зур өлеш керткәне өчен «Татарстан Республикасы агросәнәгать комплексының Мактаулы ветераны» күкрәк билгесе һәм Татарстан Республикасы Авыл хуҗалыгы һәм азык-төлек министрлыгының Рәхмәт хаты белән бүләкләнде. Юрий Евграфович күп еллар «Новый путь» коллектив предприятиесен җитәкләде, ә хатыны Анна Кирилловна белән бергә, тәрбиягә алынган өч баланы үстереп, аларга җылылык һәм тормышка юл бирделәр. 70 яшьлек юбилее уңаеннан аңа район башлыгының Рәхмәт хаты да тапшырылды.

Икенче бүләкләнүче — Сосновкадан Петр Тимирясов. Аңа да «Татарстан Республикасы агросәнәгать комплексының Мактаулы ветераны» исеме бирелде. Петр Алексеевич районда беренче булып крестьян-фермер хуҗалыгын оештырды һәм 22 ел дәвамында Фермерлар советын җитәкләп, яшь аграрийлар белән тәҗрибәсесен уртаклашты.

Кунакларны бәйрәм күчтәнәчләре белән сөендерделәр

Концерт программасында районның иң оста иҗат коллективлары катнашты: «Зарянка», «Асылъяр», «Ветеран», «Чишмә», «Лемзер», «Самант», «Забавушка», шулай ук «Бәхетле балачак», «Планета красок» һәм «Раушан» коллективларының яшь артистлары. Сәхнәдән рус, татар һәм чуваш телләрендә җырлар, шигырьләр һәм дәртле биюләр яңгырады. Бәйрәмгә аерым төсмерне дуэтлар һәм солистлар чыгышлары өстәде — Вера Захарова, Сергей Елин, Марина Лазарчук, Любовь Захарова һәм башкалар.