Чирмешән районының өч мәктәбендә капиталь ремонт бара

Ульяновка, Иске Элмәле һәм Кармыш мәктәпләрендә капиталь ремонт башланган. Бу уку йортларын яңартуга нефтьчеләр 29 миллион сум чамасы акча тотачак.

-Бер үк оешма эшчеләре төзелеш эшләрен өч мәктәптә дә параллель рәвештә алып бара, - ди район мәгариф бүлеге начальнигы Светлана Әхтәмова. - Төзүчеләр, идәннәрне сүтеп, бетонлыйлар, шул ук вакытта стеналарны да штукатурлыйлар.

Мәктәпләрнең электр, су, канализация челтәрләре, санузел тулысы белән алмаштырылачак, түшәм, ишек-тәрәзәләр дә яңарачак. Киләсе уку елыннан бу мәктәпләрнең укучылары да барлык уңайлыклары булган бинада белем алачак.

Үткән елларда ремонт булган Утыз Имән, Түбән Кәминкә мәктәпләренә яңа җиһазлар кайтару да планлаштырыла.