Чирмешән районы башлыгы хезмәт ветеранын “Безнең Чирмешән“гә яздырды

Киләсе ярты елда Таисия Николаевна Миронова да район газетасын даими укыячак. Чирмешәндә яшәүче ветеранга район башлыгы Фердинат Дәүләтшин шундый бүләк ясады.

-Элек "Безнең Чирмешән" газетасын гел яратып укыдым, - ди Горький якларында торф чыгарган, озак еллар терлекчелектә дә эшләгән якташыбыз.

-Минем бит телевизорым юк, күп яңалыкларны моннан байтак еллар элек район хакимияте бүләк иткән радиоалгычтан тыңлыйм.

Таисия Николаевна өчен 2017 ел янә истәлекле, аңа 1 сентябрьдә 90 яшь тула. -Өем торырлык, күршеләр яхшы, ике песием гел янымда, - ди ветеран. -Социаль хезмәткәрдән дә бик уңдым.