Хезмәттәшләр приз отты
Чирмешәндә яшәүче Елена Козлова һәм Екатерина Никонова бер үк оешмада – коммуналь челтәрләр җәмгыятендә эшлиләр. Шушы көннәрдә алар – икесе дә – бүләкле булдылар.
Район газетасына язылучылар арасында призлар уйнату Елена Козлованы мангаллы, ә Екатерина Никонованы өч литр баллы итте.
-Моңа кадәр шашлыкны таякларда кирпеч өстенә куеп пешердек, инде мангалыбыз бар. Бу бүләккә бик шатландык, - диде Елена. -Элек нәрсәдер отканыбыз булмады. Ә район газетасын гел яратып укыйбыз, аңа язылмый калганыбыз юк.
Екатерина Никонова редакциягә ике квитанция җибәргән: берсе – үзенеке, икенчесе – каенанасыныкы. Һәм менә приз оттылар.
-Балны сатып алган идек, әмма монысы да артык түгел, мин үзем бу ризыкны бик яратам, - ди ул. -Көтелмәгән бүләк өчен чиксез рәхмәт.
Гомумән, район газетасына 2023 елның беренче яртысына язылучылар арасында үткәрелгән акция нәтиҗәләре буенча 31 абүнәче нинди дә булса бүләк отты, ә барлык катнашучылар 131 иде.
Гөлсирә Шәрифуллина фотолары
Следите за самым важным и интересным в Telegram-каналеТатмедиа
Нет комментариев