Чирмешән районында быел беренче балалары туган гаилә 466 мең сум акча алачак

Яр Чаллыда яшәүче Рузилә һәм Салават Хәйруллиннарның күптән түгел генә беренче сабыйлары – уллары Сабир дөньяга килгән.

- 2020 нче елның 1 гыйнварыннан беренче балалары туган яки тәрбиягә алган барлык гаиләләргә ана капиталы биреләчәк, - ди РФ Пенсия фондының райондагы клиент хезмәте начальнигы Лилия Гатина. - Рузилә - Кара Чишмә кызы, туган авылында теркәлгән. Шуңа да ул безгә мөрәҗәгать итте.

Быелдан беренче бала туган гаиләгә 466 мең сум акча бирелә, ә быел икенче бала туган очракта – 150 мең сум өстәлә, барысы - 616 мең сум.

- Әлеге яңалык турында телевидениедән ишеткән идем. Шуңа да беренче балабызны алып кайткач, Пенсия фондының райондагы бүлекчәсенә барып гариза яздым, - ди Рузилә. – Хәзер инде сертификат бирүләрен көтәбез.

Ана капиталын берничә юнә­лештә кулланырга мөмкин: торак сатып алырга, йорт төзергә, торак өчен алынган кредитны кап­ларга; гаиләдәге һәр бала өчен балалар бакчасынатүләүгә, югары уку йортында белем алуга, студентларның тулай торакта яшәү чыгымнарын каплауга; сертификат иясенең киләчәк пенсиясенең тупланма өлешен үстерүгә юнәлдерергә.

Фото: автор.