189 әбигә һәм бабайга социаль хезмәткәрләр булыша

"Демография"өстенлекле милли проекты кысаларында районда озак вакытлы карау системасы тормышка ашырыла. Әлеге система авыру сәбәпле мөмкинлекләре нык чикләнгән кешеләргә дә комплекслы ярдәм күрсәтүне күздә тота, аларга үз өйләрендә яшәү хокукын тормышка ашырырга мөмкинлек бирә. Ярдәмгә мохтаҗларга хезмәт күрсәтүче социаль хезмәткәрләр һәм аларның туганнары “Тернәкләндерү һәм карау мәктәбе”ндә дәресләр ала.

-Бүлекчә хезмәткәрләре, психолог, медицина оешмасы белгечләре быел 50 дәрес уздырды. 37 социаль хезмәткәр һәм якыннары авыру 39 кеше өлкән кешене яки инвалидны карау күнекмәләре үзләштерде, - диде социаль ярдәм бүлеге директоры урынбасары Ләйсән Хәйдәрова.

“Мәрхәмәтле йөрәк” халыкка комплекслы социаль хезмәт күрсәтү үзәге медицина учреждениеләре хезмәткәрләре белән берлектә 60 яшь һәм аннан өлкәнрәкләрне коронавирус инфекциясенә каршы прививка ясау һәм диспансеризация үткәрү өчен район үзәк больницасына алып баруны да оештыралар. Быел алар ярдәме белән 218 өлкән кеше вакциан ясаткан һәм 1141 якташыбыз диспансеризация узган.

Сораулар булса, “Мәрхәмәтле йөрәк” үзәгенә 8(84396) 2-28-30 телефоны буенча мөрәҗәгать итәргә мөмкин.

Автор фотосы.