25 октябрьдә – Корбан бәйрәме

Мөселман илләренең астрономик обсерваторияләренең фәнни тикшеренүләре нигезендә, Татарстан Диния нәзарәте дә буйсынучы Хәнифә мәзһәбенең мөселман-дини мәктәбе белән килештереп, ТР Диния нәзарәте казыйлары шурасы Ай календаре буенча Зөхиҗҗә аеның беренче көне - 2012 елның 16 октябренә, ә Корбан бәйрәменең беренче көне 25 октябрьгә туры килүен исәпләп чыгарган.

Татарстан Республикасында 25 октябрь - Корбан бәйрәме көне ял булып санала.

Бу көнне республиканың барлык мәчетләрендә дә 6 сәгать 30 минутта иртәнге намаз, ә 7 сәгать 15 минутта вәгазь башланачак. 8 сәгатьтә исә мөселманнар бәйрәм намазына басалар. "Яңа гасыр" телеканалында 9.00 сәгатьтә Ак мәчеттән (Болгар шәһәре, Спас районы) турыдан-туры трансляциядә Корбан бәйрәме күрсәтеләчәк.