Якты Тау мәчетенең нурлары Рамазан аенда тагын да яктырды

Быел ремонтланган гыйбадәт йортының яшел манарасы моңа кадәр дә бик матур иде, Рамазан аенда аны тагын да ямьләндерделәр. Әти-әнисе шушы авылдан чыккан, үзе Яр Чаллы шәһәрендә туып үскән  Риназ Фәнис улы Фәсхетдиновның ярдәме белән бинаны төрле утларга “күмгәннәр”.

-Ул осталарны тапты, барлык чыгымнарны үз өстенә алды. Белгечләр яктырткычларны бер көндә урнаштырып киттеләр, - ди авыл имамы Ислам Нотфуллин. -Лампочкалар манараны да, бинаны да яктыртып тора.

Якты Тауда Рамазан аенда авыл өстенә моңлы,  әл-видаг әйтү  тарала, моңа 81 яшьлек Шәһит абый Әхмәдиев бик оста икән.

-Бездә авыз ачтыру мәҗлесләре еш уза. Әле менә кечкенә генә авылыбызда тагын 17 кеше ифтар үткәрергә чират тора. Бабайлардан калган йолаларыбызны, әлхәмделиллаһ, саклап яшибез,  – ди имам.