Чирмешән районында бер тракторчыны кулга алырга мөмкиннәр

-ВАЗ-2110 автомашинасын Яңа Элмәле урамында туктаттык. Аның йөртүчесе, Аксубай районыннан кунакка килгән ир-ат: “Кичә бәйрәм иткән идек”, дип акланса да, трубкага өрдергәч, прибор аның алкоголь кулланган булуын күрсәтте, - ди районның ЮХИДИ бүлекчәсе өлкән дәүләт инспекторы Рәмис Шәкүров.

Кагыйдә бозучыга хәзер 30 мең сум штраф яный, кунакка да машинага пассажир буларак кына утырып килергә туры киләчәк, чөнки  закон буенча аңа ел ярымнан ике елга кадәр  машина йөртү хокукыннан мәхрүм итү каралган.

Ә менә Яшәүчедә берәүнең автотранспорт йөртергә бөтенләй “права”сы булмаган. Ул да инспекторлар “кармагына” эләккән.

-Шулай да якташыбыз трактор руле артына утырган, өстәвенә, салган да иде. Аңа исә 5 тәүлектән 15 тәүлеккә кадәр кулга алыну  яки 30 мең сум штраф җәзасы бирелергә тиеш, - ди Рәмис Шәкүров.

Фото архивтан