Иске Кади “пәрәпәче”н Тукай районында пешергәннәр

-Танытты дип инде, ул болай булды. Тукай районындагы санаториядә аккалфаклыларның республика күләмендә күчмә утырышы узган иде, - ди Зөлфирә Барый кызы. - Аның программасында бер бәйге дә оештырганнар. Безгә - иллешәр кешелек өч командага бәрәңге, он, йомырка, май бирделәр дә: “Кунаклар каршы алырлык нинди дә булса ризык пешереп күрсәтегез”, - диделәр. Шунда әлеге пәрәмәчне пешердем. Ошаттылар Кади “пәрәпәч”ен.  Моңардан тыш, утырышта күп нәрсәләр өйрәндек, кайткач барысын да кызларга сөйләдем.

Иске Кади  авылындагы ”Ак калфак” оешмасы уникеләп хатын-кызны берләштерә, алар - “Асылъяр” җыр ансамбле артистлары да. Рузилә Мөхтәстимова җитәкчелегендәге аккалфаклылар авылларга чыгып концертлар куялар, бер-берсеннән кул эшләренә, пешерергә өйрәнәләр, иң мөһиме – аралашып, үзләренчә кич утырып, ял итеп кайталар. Хәзер бакча эшләре бетте, кызлар авыл мәдәният йортында ешрак очрашырга килешкәннәр.

фото: Зөлфирә Сафина