Исереккә юл тар

"Ватан сакчылары" бәйрәме тирәләрендә район юлларында исерек килеш машина йөртүче дүрт шофер тоткарлана. Автоинспекторлар әйтүенчә, аларның кайберләренең хәтта телләре "әйләнмәгән".

-22 февраль көнне Лашман ягыннан Чирмешәнгә килүченең "Калина"сы юл кырыена төшеп китә. Аның йөртүчесе нык салган иде. Ярый әле шул вакытта аңа каршы килүче булмаган, күрүчеләр әйтүенчә, ул юл уртасыннан барган, - ди районның ЮХИДИ бүлекчәсе инспекторы Рәмис Шәкүров. - Лашман борылышында төнлә туктаткан машина хуҗасы да дөм исерек иде. Ул шул хәлдә Түбән Камага китәргә җыенган.

Читтән килгән ЮХИДИ экипажлары да бәйрәм көннәрендә исерек хәлдә машина йөртүче ике райондашыбызга карата беркетмәләр төзегәннәр.