Чирмешән курсантлары язгы чәчүгә әзер

Нурлат аграр техникумының Чирмешән филиалында да язгы кыр эшләренә әзерлек бара.

Филиалның 400 гектар чәчүлек җирләре бар. Шуның 166 гектарын уҗым культуралары били.

-Агымдагы елда 80 гектарда бодай, 70 гектарда арпа һәм 10 гектарда күпьеллык үләннәр чәчәргә планлаштырабыз, - ди филиалның хуҗалык идарәчесе Айдар Ганиев.- Язгы чәчүгә җитәрлек күләмдә орлык материалы тупланган. Аларны көздән үк орлык инспекциясендә тикшерттек, якын көннәрдә тагын бер кат тикшерүгә җибәрәчәкбез. Техника әзерлегенә килгәндә, кыр эшләрендә ун трактор катнашачак, аларның икесенә генә агымдагы ремонт үткәрәсе бар, калганнары сафта. Тагылма агрегатларны да көздән үк ремонтлап куйдык. Яңа чәчкеч алган идек, аны да җыйдык, ул кырга чыгарга әзер. Җитештерү базасындагы эшләргә курсантларны да җәлеп итәбез, алар биредә практика үтәләр.