Лашманда депутатлар акция уздырды

Лашман урта мәктәбенең Балалар думасы депутатлары башлангыч сыйныф укучылары арасында "Һәр кошчыкка - җимлек!" дип исемләнгән акция үткәрделәр.

Башта депутатлар төрле материаллардан җимлекләр ясау турында презентация күрсәттеләр, бу эшнең зур әһәмияткә ия булуы хакында аңлаттылар. Шуннан соң башлангыч класслар эшкә кереште.

Балалар ясаган 25 җимлек арасында ниндиләр генә юк. Кемдер пластик шешәдән ясаган, икенчесе агач, пластик материаллардан файдаланган, зур фантазиялеләр хәтта сок савытларын да кулланган.

Укучылар 15 җимлекне мәктәп тирәсендәге агачларга элделәр, ә калганнарын өлкән сыйныфлар чаңгыларда урманга илтергә булдылар, бу суык көннәрдә урман кошлары да ярдәмгә мохтаҗ.

Галия Динмөхәммәтова.