Чирмешәндә яшәүче Гыйльфановлар сайлауга беренче көнне үк килделәр

-Без сайлауларга элек-электән гаилә белән йөрергә гадәтләнгән, анда бәйрәмгә барган кебек җыенабыз, - диде гаилә башлыгы Хәмзә Морадыйм улы. – Бүгенгесенә кызыбыз Илүзә белән килдек.

Илүзә Гыйльфанова – яшь табиб. Ул үткән ел ординатура тәмамлап район үзәк больницасына эшкә кайткан, поликлиникада терапевт булып эшли.

-Туган авылымда эшләүгә, авыруларга ярдәм итә алуыма мин бик шат. Президент сайлауларында, яшьләргә игътибар тагын да артуын теләп, тавышымны ышанычлы, лаеклы кандидатка бирдем, - диде Илүзә Хәмзә кызы.

Илүзәнең әнисе Гөлсинә Гариф кызы да гомере буе район үзәк больницасында шәфкать туташы булып эшли.

-Сайлауларга шатланып килдек. Районыбызда яшәү шартлары елдан-ел яхшыра, авылыбызда һөнәребез буенча эшебез бар. Балаларыбыз да Чирмешәндә эш тапты. Төрле милләт кешеләре белән дус-тату, бер гаилә кебек гомер итәбез, - диде ул.

-Илләребездә тынычлык урнашсын, сугышлар бетсен дигән теләк белән тавыш бирдек, балалар, оныклар бәхетле булсыннар, - дип сүзгә кушылды Хәмзә Морадыйм улы. – Һәркем үзенең бурычларын белеп, хокукларыннан файдаланып яшәсен иде.

Гыйльфановлар сайлау участогы янында, махсус браслет киеп, фотога да төштеләр, аны  #ВсейСемьейНаВыборы #ТатарстанАлга хэштэглары белән ВКонтакте һәм Instagram битләренә куйдылар. Ул Татарстанда сайлаучылар арасында өч автомобиль отышында катнашырга хокук бирә.

 Кадрия Гамирова фотолары