Чирмешәндә чыгарылыш сыйныф укучылары аттестатлы булды

Алар – 23 малай һәм кыз – барысы да бердәм дәүләт имтиханын бирүне сайлаган. Араларында алтын медаль иясе – Зилә Җиһаншина да бар.

Ул мәктәпне гел “бишле” билгеләренә генә тәмамлаган. Киләчәктә Зилә табиб булырга хыяллана, шуның белән бәйле, химия һәм биология фәннәреннән имтихан бирүне сайлаган.

Быел районда унберенче сыйныфны 124 укучы тәмамлый.

Коронавирус белән бәйле, быел мәктәпләрдә уку барышы зур үзгәрешләр кичерде: дәресләр онлайн-форматка күчерелде, соңгы кыңгырау бәйрәме дә Интернет аша гына узды, имтиханнар бирү көннәре дә кичектерелде.

Пандемия сәбәпле, тугызынчы сыйныфны тәмамлаучылар дәүләт имтиханнарын тапшырып тормадылар. Унберенче сыйныфларга да сайлау мөмкинлеге бирелде: югары уку йортына керергә теләгең бар икән – имтиханнарны тапшырасың, андый теләгең булмаса имтиханнар бирү мәҗбүри түгел. Җиде якташыбыз имтихан тапшырмаска карар кылган.

фото: автор