“Татавтодор” автомобиль юллары идарәсенең райондагы участогы эшчеләре Чирмешәнне әйләнеп узу юлының икенче өлешенә асфальт түши башладылар.
Юлчылар Кече Чегодай авылы янындагы “Татнефть” ягулык салу станциясеннән Шентала станциясе уңаендагы “Таиф” заправкасына кадәр 3 километр 400 метр арада юлга капиталь ремонт ясыйлар.
-Юлда җир эшләре төгәлләнде, аслыгын цемент белән ныгытып, су агарга торбалар салдык. Хәзер юлга ком һәм вак таш түшәп, беренче катлам асфальт түшәү башланды, - диде участок начальнигы Исхак Әбүнәгыймов.
Быелга объекттагы эшләрне, һава торышы яхшы торса, октябрь ахырларына тәмамларга планлыйлар. Киләсе елга биредә икенче катлам асфальт җәеп, юл кырыйларын (обочина) ныгытачаклар.
Нет комментариев