Урамда кәҗәләр: бакчаларыгызны карагыз

Авылга кунакка кайткан шәһәр кешеләре машиналарын йорт алдында калдырып хуҗалык эшләре белән шөгыльләнә. Ә кәҗәләр аларның машиналарының түбәсенә үк менеп тояклары белән техникага зыян сала. Шундый берничә очрак булганы бар. Ремонт эшләре бер дә арзан түгел, унар мең сумнарга төшә.

Октябрь аенда кәҗә көтүе челтәр-рабицада тишек табып, безнең бакчага кергән. Алар ике алмагачны, эрбет (кедр), слива һәм чыршы агачларын кимергәннәр.  Әлеге алмагачларны мин 20 ел үстердем, уңыш та бирәләр иде. Алар һәм Кемерово өлкәсеннән туганнар җибәргән кедр – минем мактанычым иде. Тик, кызганыч, хәзер агачлар терелеп китәрлек түгел инде. Ник кәҗәләрне абзарда, арканда тотарга яки чиратлап көтәргә мәҗбүр итмиләр икән? Шушы хайваннарның һөҗүменнән соң яшелчә, җиләк-җимеш уңышыннан колау кагу бер дә яхшы хәл түгел бит.

Элек авыл урамнарында дуңгызлар да йөри иде. Хәзер моны тыйдылар – хуҗалары аларны абзарларында тота. Кәҗәләрне асрауда да бер тәртип булсын иде. Алар бакчаларга, машиналарга зыян салып урамда йөрергә тиеш түгел. Без әлеге мәсьәләдә Иске Үтәмеш авыл җирлеге җитәкчелегенең ярдәменә өметләнәбез.

Евгений Илюхин.

Иске Сережкино авылы.