Туймәттә яшәүче ветеран ураза аен көтеп ала

Быел да уразаны көтеп торам, исәнлек кенә булсын, дим. Намазлар, догалар укып көннең узганы сизелми дә диярлек. Арып китсәң, ятып алырга мөмкин.

Ураза вакытына тәм-томнарны күбрәк алабыз, кибеттә бит хәзер бөтен әйберне саталар, запас җыймасаң да була. Янымда киленем бар, кирәген алып кайтып бирә. Әле кибеткә үзем дә йөри идем дә, үзизоляция булу сәбәпле, урамга чыкмаска тырышам, сакланырга, чир белән бергәләп көрәшергә кирәк.

Ел саен Рамазан аенда кунаклар җыеп өйдә ифтар ашы уздыра идек. Быел ничек булыр инде, бергәләп авыз ачу күңеллерәк инде дә. Авылда да авыз ачу мәҗлесләре һәр көнне диярлек була иде, мәчеттә ифтар оештыру да гадәткә кереп китте. Быел алай җыелып булмас кебек, шулай да уразалар тотып, игелекләр кылып яшик. Яман чирләр генә килмәсен.

Миңнегөл Гатина.

Туймәт авылы.

фото: архив