Түбән Кәминкә авылы мәчетендә һәр көнне диярлек ифтарлар узды
Соңгы елларда ифтар мәҗлесләрен мәчетләрдә уздыру матур гадәткә әйләнде. Бер гаилә балалары җыелышып, дин йортыбызның махсус залында якыннарын җыеп авыз ачтыра.
Быел мондый мәҗлесне авылыбыз мәчетендә беренчеләрдән булып Минсәгыйть һәм Мөнирә Җамалетдиновларның балалары оештырды. Табынны зурлап кода-кодагыйлары, кияү-киленнәре, туганнары, авылдашлары җыелды, район башкарма комитеты җитәкчесе, авылдашыбыз Илнур Минсәгыйть улының хезмәттәшләре, район мөхтәсибе Рамил хәзрәт Ибраһимов та килде.
Мәчеттәге чираттагы ифтарны мәдәният йортының “Ак калфак” коллективы, балалар бакчасы, мәдәният йорты, китапханә, элемтә бүлекчәсе хезмәткәрләре берләшеп оештырдылар. Аннан соң Вәлиев Әмин һәм Мөхтәррәмә балалары авыл халкын мәчеттә сыйлады. Мәктәпнең 1977 елгы чыгарылышы укучылары да ифтар уздырып, мәрхүм булган якыннары рухына догалар укыттылар. Ай буена, һәр көнне диярлек, мәчеткә ифтарга җыелдык.
Мәҗлесләрне мәчетебез имамы Рәмис Мәссаров, Рәфис Әгъзамов, Рауф Мостафин, Рифкать Закировлар, динебез кушканча, матур итеп уздыра. Дин йортыбыз үзенә дәшеп тора, анда якты, чиста, матур, барлык шартлар тудырылган.
Фаил Гафиятуллин.
Түбән Кәминкә авылы.
Следите за самым важным и интересным в Telegram-каналеТатмедиа
Нет комментариев