Чирмешән районы комбайнчылары уракта тырышлар, сайлауларда активлар

- Быел эшләргә дә кызык, уңыш яхшы, басулар чиста, һава торышы да көйләнде, - ди комбайнчы Илһам Мортазин. - Менә, тавышымны бирәм, сайлыйм да, янә кырга китәм. Ә сайланасы депутатларга теләгем бер – яхшы законнар кабул итсеннәр, авыл хуҗалыгына күбрәк булышсыннар, яшьләрне кайгыртсыннар.

Рәмис Хәсәенов комбайнда беренче генә сезон, алай да алдынгылар сафында.

- Кичә 15 бункер бодай суктырдым, эш көйле бара, - ди яшь механизатор. - Айныкын-айга хезмәт хакы алабыз, бу эшкә дәрт уята.

- Бездә эшләүчеләр – төрле авыллардан. Күбесе иртән үк сайлау участокларына барганнар, - ди җәмгыять идарәчесе Руслан Хәлиуллин.

Чирмешән районының башка авыл хуҗалыгы предприятиеләрендә дә урак азагына якынлаша, 75 процент чамасы мәйданнан уңыш суктырып алынган да. “ЧИРМЕШӘНАГРО“, “Сөлчә“, “Әккәрәй“, “Күтәмә АГРОфирмасы“ жәмгыятьләрендә уңыш та яхшы, темп та югары.

Автор фотосы.