Туймәт мәчетендә һәр көнне ифтар мәҗлесе уза

-Дин йортындагы быелгы беренче ифтарны мәчет уздырды. Рамазан ае башлану белән ифтар уздыручыларның исемлеген төзедек, ай дәвамында бер буш көн дә калмады, - диде әлеге эшләрне оештыручыларның берсе Айнур Кәримов. – Әлеге айда һәркемнең изгелек эшләп калырга теләве бик куанычлы. Бер гаилә балалары җыелышып авылдашларын сыйлый. Шул көннәрдә, якыннары махсус хәрби операциядә катнашучыларның гаиләләре ифтар оештыра. Мәчеттә көйләнүче мәҗлескә 50ләп кеше җыела.

Табын уздыру өчен мәчеттә барлык шартлар да бар. Әле үткән ел гына аш әзерләү бүлмәсендәге кухня гарнитурын яңартканнар. Бу изгелекне, үзе исән вакытта, Роберт Фәссахов эшләп калдырган. Электр плитәсен мәчет акчасына сатып алсалар, аның улы Эдуард ярдәмендә электр мичле дә (духовой шкаф) булганнар. Аш бүлмәсендәге савыт-сабаларны игелекле авылдашлар бүләк иткән.

-Әле 60 кешелек табын көйләү өчен, җитәрлек күләмдә яңа савыт-саба комплектларга ниятләп торабыз, - диде Айнур Айдар улы.

Финанс эшләрен Хәлидә апа Әхмәтҗановага йөкләгәннәр. Рамил һәм Наилә Кәримовлар кирәкле азык-төлек белән тәэмин итеп тора. Аш-су әзерләргә дә кешеләр бар - Лилия Рәҗәпова, Рәмзия Фәссахова, Әлфирә Мортазиналар моңа теләп ризалашканнар. Мәчеткә укырга йөрүче хатын-кызлар да ифтар уздырырга булыша.

Кадрия Гамирова фотолары