«Интертат» электрон газетасы «Татарча лайфхак» проектын тәкъдим итте

(Казан, 24 ноябрь, "Татар-информ"). «Интертат» электрон газетасы «Татарча лайфхак» проектын тәкъдим итте. «Лайфхак» сүзен татарчага «файдалы киңәш» дип тәрҗемә итеп була. Бу проект кысаларында укучыларга татар халкы белән бәйле лайфхаклар тәкъдим ителәчәк. Алар видео форматында булачак.

«Татарча лайфхак»ның беренче чыгарылышы гади, әмма бик кирәкле: чәкчәк пешерү. Проект авторларының берсе, журналист Илгиз Шәкүров сүзләренә караганда, алдагы чыгарылышларда да татарлыкка басым ясалачак. Мәсәлән, татарча биергә, татар калфагы тегәргә өйрәтәчәкләр. Шулай ук татар халкының йолаларына да тукталачаклар.

«Тел яшәсен өчен ул кулланылышта булырга тиеш. Хәзер интернет заманы. Димәк, татар теле интернетта да булырга тиеш. Кызганычка, әлегә интернетта татар телендә сыйфатлы контент бик аз. Видео форматында лайфаклар әзерләп, без бу проблеманы хәл итүгә үз өлешебезне кертәбез», - дип белдерде Илгиз Шәкүров.

Бу хакта тулырак: https://tatar-inform.tatar/news/2018/11/24/175811/