Чирмешән районында машина йөртүчеләрне тикшерү дәвам итә

13 сентябрь көнне узган "Тоннель" операциясе кысаларында ЮХИДИ хезмәткәрләре, участок инспекторлары белән берлектә, юл йөрү кагыйдәләрен бозучыларга карата алты административ беркетмә төзегәннәр.

-Ике сәгать дәвамында, транспортта куркынычсызлык каешларын такмаган дүрт кеше туктатылды. Шулай ук баласын автокреслога утыртмаган һәм тыелган урында туктаган өчен ике машина йөртүче дә административ җаваплылыкка тартылачак, - ди район ЮХИДИ бүлекчәсе начальнигы Самат Хәйруллин.- "Тоннель" операциясе район үзәгендә иртәгә, 14 сентябрьдә дә дәвам итәчәк. Автоинспекторлар иртәнге сәгать 7дән 9га кадәр Лениногорск- Чирмешән юлында һәм Чирмешән лицее янында кизү торырга җыеналар.