Чирмешән пилоты зур ярышта узышты

Остазы, Чирмешәндәге “Профи” картинг-клуб тренеры Ленар Гарифуллин әйтүенчә, әлеге ярышта 19 районнан пилотлар (кечкенә узыш машиналарын - картларны иярләүчеләрне шулай атыйлар) катнашкан. Мондый саллы ярышта тәүге тапкыр чыгыш ясаган, Чирмешән лицееның 3 сыйныф укучысы Аслан Хәлиуллин өчен йөзләп яшь спортчы арасында узыш нәтиҗәләре буенча урталыкта булу – бик яхшы күрсәткеч. Ул Honda GX-200  классында ярышкан.

Райондагы картинг-клуб түгәрәгендә Чирмешәннән 6 яшьтән 13 яшькә кадәрге 18 бала шөгыльләнә. Аларны район Сабан туйлары уза торган стадион мәйданында  атнаның якшәмбе көннәрендә күрергә мөмкин. Җәйге каникул вакытында исә пилотлар атнасына ике тапкыр шөгыльләнәләр.

-Безнең карт дип аталучы өч спорт машинабыз бар. Түгәрәк эшенә ярдәм итүче  район башлыгы Фердинат Дәүләтшинга,  спорт бүлегеннән Ләйсән Глүмовага,  иганәчегә - “БИО-АГРО” җәмгыятенең райондагы идарәчесе Руслан Хәлиуллинга бик зур рәхмәт, - ди балаларның  тренеры Ленар Рәис улы.